嘉麟樓月餅


年年中秋都食月餅,唔係美心,榮華就係大班,都食到悶悶地。直至數年前,在公司收到從某Vendor送來的一盒嘉麟樓月餅後,其他名牌月餅也被我打入冷宮了!

嘉麟樓月餅一盒十六舊,每件嘅Size都好似雞仔餅般,一啖都可以食哂。食落口後,鬆軟無比,味道亦不濃不淡,簡單講就係「正」!!

咩話?係邊度買?下年早D去九龍半島酒店訂啦!因為會好快賣哂,雖然成百六蚊先得八舊。



 






「工傷杯」的煩惱


「日遊夜遊足球隊」今年再次參加「工傷杯」,而今日終於收到賽會嘅賽程表。細看之下,10月7日打第一場分組賽,初時都唔為意,唸唸吓先知原來下星期就係!真係比佢比佢嚇咗一嚇。因為咁,我就急不及待走均大半間公司地通知各隊友!

五點後,依舊到後梯找「萬先生」時,撞到高洛治及星神,佢倆個同我一樣,都係後梯嘅VIP。今日嘅話題,當然離不開「工傷杯」啦。講講吓,總會講到排陣呢個話題,正確D講,係難題。對我呢個常務打雜嚟講,最近的確惡搞。不是我不懂排(筆者按:其實可能真係唔識!),而係根本就係幾難排!原因很簡單---人材流失。由年頭中場大腦「望警署的人」開始、「PL」、「火爆人」及「鄧金」的相繼離去,新加入的,又要安排一個合適嘅位置比佢,安排一個合適嘅位置當然亦要花時間花心機。一時間「日遊夜遊足球隊」要再次調整。點調整?我鬼知!真的令人唸爆頭。



Hong Kong Wetland Department Store!?!?


大老闆成日話想去天死圍新開嗰個「濕地百貨」走番轉,再加上財政大臣亦話冇問題喎。

唔好奇怪,你冇睇錯,我亦冇寫錯!總之真係「濕地百貨」!!如果多D「自由含」,仲可以再改做「濕地國貨」!!嗰度嘅人流好比比年宵市場,熱鬧嘅程度好比銅鑼灣 SOGO!冇計,香港人係「新屎坑三日香」呢句說話認真冇錯。


↓唔好以為呢真係濕地公園,其實正確名稱係「濕地百貨」


其實,我地呢D唔好花草又唔好樹木嘅人來講,除咗影相同陪大老闆之外,呢間「百貨公司」係冇乜好行嘅。冇計!悶到抽筋咁都要去啦。

↓唔信!有相為証!呢條係紅葉林浮橋,多人到好比旺角彌敦道。


短短兩小時多,已可走遍整個「濕地百貨」,結論都係一樣:「新屎坑三日香」餘,
更從現場其中一句標語,發覺中國人真係視呢D嘢如無物。咩標語?望吓下面咪知囉。




歐偉倫當年的單刀撗傳

雖然係好耐之前嘅片段,一個偶然的機會,比我在網上搵到,就Share比大家睇啦!!!

AuWaiLun.gif

片段中香港隊(紅衫)前鋒歐偉倫在禁區頂接應隊友交波,在無人看管的情況下,他竟選擇將皮球撗傳於左方隊友,而不是帶著皮球直入禁區,仞己隊錯失大好入波良機,史稱單刀撗傳也。 

不經不覺唔多覺


不經不覺,貝隆夫人遠赴「米字國」也一年有多了,個多月後就是她回歸的大日子。全家上上下下等待這天來臨,相信也很久了,特別係望穿秋水的老媽,即使佢把口話唔係都冇人信,相信這年來佢條頸也長了兩吋呢!!

其實,我很羨慕她,羨慕她可以賽現夢想,羨慕她可親身到達奧脫福聖城,更羨慕她為交學費而找Part Time 及羨慕她冇餐好食.....當然最相信她看畢此文後肯定唔會幫我買曼聯信!!


二奶進修班

呢個題目好似唔係一個可以公開地放上網嘅題目!?!?!

某天午飯時段,朋友S來電。佢問咗一個問題:「喂!你試過同我同班嗎?」

「未!!」我好肯定咁回答。

「咁依家比個機會妳同我做同班同學啦!我揾到個操控二奶進修班呀,有冇興趣呀?」佢得戚地講。


「好呀!無所謂啦。」我梗係制啦!我包起呢個C字牌頸嘅二奶,大大話話都有大半年之久,一直苦無機會去唸點樣去「摸索」佢,今次有機會了,正!

今日,係報名嘅日子,撞正同事E亦都肯齊齊學吓呢味嘢,再加上朋友S嘅同事,一行四人就咁成團。

不過剛醒起開課當日正正係貝隆夫人回歸之日,睇怕D時間有就!
慘!!

我這個二奶,雖不算什麼頂級正貨,但以我呢個二奶入門友來講,已算有多「花式」玩了,呀!唔係「花式」應該係「功能」。點都好,財政大臣又被打入冷宮睇怕事在必行!!


 
     

朝聖~~~向我們的聖城進發!!


往聖城朝聖是我的願望,我亦隨時隨地計劃著行程,可惜萬事接近俱備,就是只欠$$,這願望或許係一個遙不可及,但有志者事竟成,誰說不可實現!

近日與同事Y談起,發覺他亦跟我原來有著同一個願望,我有想過與佢同行,但係我同佢想朝拜嘅目標都唔同,他要去的是「晏菲路聖城」,而我當然要去「奧脫福聖城」。教派不同,這方案可行嗎?

再細想,倆城其實相隔很近,再加上小弟尚未出爐嘅超級周密行程,我保證此行絕對賞心!!!





但我地真係去先再講啦,唔煲無米粥啦~~~


過山車


突然間想起過山車。還記得第一座海洋公園的過山車在中學時代,正確是哪一年則記不起了!

估不到剛過去的一星期,是整個星期,和座過山車沒有兩樣。周遭所發生的事有喜有悲,喜的令你覺得像是駛向高點;悲的會使你從高處衝下來;有時更覺三百六十度旋轉似的。

太剌激了,看來我受不了。我喜歡的是遊樂場內的過出車,而不是人生過出車。我可以選擇放棄不玩嗎?當然可以,雙腳一伸的時候吧!!